L-Importanza tal-Fjuri Selvaġġi
Il-fjuri selvaġġi, minbarra li jpaxxu l-għajn, huma importanti għas-saħħa tal-pjaneta tagħna. Peress li dan ix-xahar niċċelebraw il-Ġimgħa Internazzjonali ddedikata lill-Fjuri Selvaġġi, tagħmel tajjeb li ssir taf daqsxejn aktar dwar dawn il-ħlejjaq sbieħ biex tifhem aħjar xi rwol għandhom fl-ekosistemi.
Normalment, dawn il-fjuri selvaġġi li jikbru fin-natura jkunu nattivi għar-reġjun partikolari li jikbru fih, u għaldaqstant ikunu kapaċi jaddattaw irwieħhom perfettament għal dan l-ambjent tagħhom mingħajr ebda bżonn ta’ intervent uman. Dawn il-ħlejjaq sbieħ għandhom rwol importanti ħafna fl-ekosistemi lokali għax jipprovdu ikel u kenn għal bosta annimali u insetti.
Iċ-Ċentawrja Maltija hija fjura selvaġġa li tinstab biss f’ċerti postijiet fil-gżejjer Maltin. Permezz tal-kuluri tagħha u l-irwejjaħ li tarmi, din il-fjura tattira n-naħal u l-friefet li jdakkruha biex b’hekk jibda l-proċess tar-riproduzzjoni li jdawwar iċ-ċiklu tal-ħajja.
B’dan il-mod iċ-Ċentawrja tagħti l-kontribut tagħha lejn ekosistema bilanċjata billi tassisti ħlejjaq dakkara bħalma huma n-naħal li jgħinu fit-tkabbir tax-xtieli li aħna niddependu fuqhom u li nikkonsmaw, bħall-frott u l-ħaxix.
Iċ-ċiklu tal-fjuri selvaġġi jinqasam f’erba’ stadji. Ix-xitla tibda bħala żerriegħa li tittajjar mir-riħ, jew li tiġi trasportata mill-annimali jew permezz tal-ilma. Jekk iż-żerriegħa jkollha kundizzjonijiet addattati, din tinbet u tibda tkabbar l-għeruq – dan il-proċess jissejjaħ ġerminazzjoni.
Waqt li x-xitla tkun qed timmatura, din tiżviluppa l-friegħi, il-weraq u l-fjuri. Wara l-ġerminazzjoni jkun imiss il-polinazzjoni. Matul dan l-aħħar stadju l-fjuri jattiraw l-insetti pollinaturi li jgħinu lill-fjuri jipproduċu ż-żerriegħa biex b’hekk ikompli ċ-ċiklu.
Nispera li permezz ta’ din in-niskata informazzjoni titgħallmu tapprezzaw aktar il-valur ta’ dal-fjuri selvaġġi u l-kontribut indispensabbli li jagħtu lill-ekosistemi għax ngħiduha kif inhi, jekk in-naħal jonqsulhom il-fjuri, lilna l-bnedmin ser jiskarsalna l-ikel!