Il-Programm tas-Sajf tal-Istudenti lura b’aktar avvenimenti

---

Il-Programm tas-Sajf tal-Istudenti ta’ Heritage Malta jirritorna mid-29 ta’ Ġunju sal-14 ta’ Settembru b’24 attività madwar Malta u Għawdex. Il-programm jistieden lit-tfal u l-adolexxenti ta’ bejn 6 snin u 14-il sena biex jittrasformaw il-vaganzi tas- sajff’avventura indimentikabbli fl-istorja mlewna tal-gżejjer tagħna.

Maħluq biex jgħaqqad it-tagħlim mad-divertiment, il-programm joffri lill-parteċipanti u lill-familji tagħhom esperjenzi interattivi f’mużewijiet u siti, imfassla biex jiftħu twieqi fuq l-istorja, l-arti, il-kultura u x-xjenza lil hinn mill-klassi.

Artisti żgħażagħ jistgħu jesploraw il-pittura bit-tempra, l-istampar bl-intaglio u l-fotografija f’MUŻA – Il-Mużew Nazzjonali tal-Arti tal-Komunità, jiskopru s-simboliżmu fil-pitturi tal-eks mexxejja ta’ Malta fil-Palazz tal-Gran Mastru, u jitgħallmu dwar l-istemmi araldiċi fil-Forti Sant’Iermu u l-Mużew Nazzjonali tal-Gwerra.

Dawk bl-istorja u l-arkeoloġija għal qalbhom jistgħu jiskopru kif in-nies kienu jbaħħru fil-preistorja fil-Kumpless Preistoriku ta’ Ħal Tarxien, jeżaminaw artefatti mtellgħa minn taħt il-mewġ fiċ-Ċentru ta’ Interpretazzjoni dwar il-Bennejja tal- Fortifikazzjonijiet, jisimgħu rakkonti dwar pirati u stejjer tal-biża’ fil-Forti Sant’Anġlu, u jitgħallmu dwar l-għadam u l-iskeletri ma’ osteologu fil-Katakombi ta’ San Pawl. Fil-Park Arkeoloġiku tal-Ġgantija f’Għawdex, il-parteċipanti se jiskopru kif kien jinħadem il-fuħħar ħafna qabel l-invenzjoni tar-rota tal-fuħħar.

Fost l-attivitajiet insibu wkoll missjoni fejn il-parteċipanti jridu jaqtgħu kodiċi fl-eqqel tat-Tieni Gwerra Dinjija u sessjoni ta’ Tombla fil-Mużew fil-Forti Sant’Iermu u l-Mużew Nazzjonali tal-Gwerra. Fil-Palazz tal-Inkwiżitur, l-istudenti jistgħu jesploraw ikel tradizzjonali Malti, jiskopru kif kienu jitħejjew deżerti ffriżati qabel il-mezzi moderni ta’ tkessiħ, u jippruvaw tekniki tal-ħjata mnebbħin mill-moda storika.

Xjentisti ċkejknin jistgħu jinvestigaw uħud mill-aktar speċi kurjużi tal-oċeani – mill-bram u l-iljun il-baħar sal-bebbux – fil- Mużew Nazzjonali tal-Istorja Naturali, fejn se jkunu jistgħu jgawdu wkoll il-wirja temporanja ‘In-Natura fil-Folklor Malti’, li ġiet estiża sal-Ħadd 19 ta’ Lulju b’talba popolari. F’Għar Dalam u l-Mużew, imbagħad, se jiskopru kif żrieragħ żgħar jikbru f’siġar kbar u b’saħħithom.

Waqt it-tnedija tal-programm, il-Kap Eżekuttiv ta’ Heritage Malta, Noel Zammit, qal li: “Il-programm iwassal wirt pajjiżna bħala esperjenza ħajja, u l-mużewijiet u s-siti tagħna bħala spazji akkoljenti fejn il-familji jistgħu jqattgħu ħin ta’ kwalità flimkien. B’dawn l-attivitajiet, l-aġenzija timmira li tqanqal il-kreattività, il-kurżità, il-ħsieb kritiku u apprezzament aktar profond tal-wirt ta’ Malta fil-ġenerazzjonijiet li telgħin.”