Fejn iħobbu jsiefru l-Maltin?

---

Malta magħrufa l-iżjed għas-settur tat-turiżmu u n-numri kbar ta’ turisti li nilqgħu kull sena, imma dan ma jfissirx li l-Maltin ma jsifrux bnadi oħra. Biss biss, bejn Jannar u Marzu ta’ din is-sena, kien hemm 181,403 Malti li bakkar għal btala.

L-iżjed destinazzjoni maħbuba mal-Maltin hija l-Italja; il-pajjiż tar-Rinaxximent, magħruf għall-pizza, l-għaġin u l-arti. Bejn Jannar u Marzu kien hemm 62,564 ruħ li ddeċidew li jmorru l-Italja, avolja s-sena l-oħra kien hemm 63,418-il Malti li żaru lill-ġar tagħna bejn dawn it-tliet xhur.

It-tieni l-iżjed destinazzjoni popolari hija r-Renju Unit. 19,719-il Malti żaru l-Ingilterra fil-perjodu msemmi qabel, waqt li s-sena l-oħra kienu 23,884 li żaru l-Ingilterra f’dan iż-żmien. Huma ħafna dawk il-Maltin li jippreferu jaħarbu mis-sħana kiefra tal-Mediterran u jmorru l-Ingilterra, pajjiż b’kultura simili fejn jitkellmu l-Ingliż.

Hemm ħafna fatturi li wieħed jista’ jikkonsidra meta tara għaliex dawn iż-żewġ postijiet huma l-iżjed favoriti qalb il-Maltin. L-iżjed waħda li tispikka hija l-istorja u l-kultura. 

Malta damet taħt ħakma Ingliża għal iżjed minn 100 sena, filwaqt li minn dejjem kien hawn kultura Taljana f’Malta minn żmien ir-Rumani.

Parti simili mill-kultura bejn iż-żewġ pajjiżi u Malta hija l-futbol. Jekk tistaqsi Malti liema tim tal-futbol jappoġġja, hemm ċans kbir li jsemmilek tim Ingliż jew Taljan bħal xi Liverpool jew Juventus. 

Hemm numru kbir ta’ Maltin li saħansitra jmorru barra minn Malta sabiex jaraw logħba jew anke kunċert t’artist famuż li għadu ma ġiex Malta.

Hekk kif in-numru ta’ Maltin li jżuru dawn il-postijiet ‘tradizzjonali’ għas-safar baqa’ kostanti, postijiet oħra bħal Spanja u l-Greċja qed jiżdiedu fil-popolarità mal-Maltin. Iż-żewġ pajjiżi jinsabu fil-Mediterran u qegħdin tefgħa ta’ ġebla ’l bogħod minn Malta. Allura jagħmel sens li ħafna jduru għalihom.

Ċifri oħrajn kemxejn mhux tas-soltu huwa n-numru ta’ Maltin li marru l-Indja. Bejn Jannar u Marzu ta’ din is-sena 5,592 ruħ żaru l-Indja, żieda ta’ 2,320 mis-sena l-oħra. Għalkemm l-Indja mhux viċin jew simili fil-kultura, qed issir xi ħaġa iżjed komuni li n-nies isiefru ’l bogħod mid-dar u jesploraw kulturi differenti.