L-eżamijiet wara l-bieb!

---

“Le, għadni ma bdejtx.” 

“Qed nipprova ma nippanikkjax.” 

“Qisu moħħi waqaf jaħdem.” 

Jekk dan il-kliem qed jinstema’ aktar mis-soltu bħalissa, hemm spjegazzjoni sempliċi ħafna: wasal iż-żmien tal-eżamijiet. 

Dak iż-żmien tas-sena fejn f’daqqa waħda kull student jibda jgħix qalb il-kotba u l-karti, bl-istress u t-tfakkiriet kostanti ta’ kemm “dan il-perjodu huwa importanti għall-futur tiegħek”. 

U iva … dak iż-żmien fejn “se nibda nirrevedi fis-7pm” u tispiċċa tibda fil-11pm wara siegħa tara xi film, kriżi żgħira fuq kemm fadallek xogħol. 

Għal ħafna studenti, l-eżamijiet ma jfissrux biss test jew marka. Iġibu magħhom pressjoni kbira, ansjetà u biża’ li ma tkunx qed tagħmel biżżejjed. 

Xi studenti jħossu pressjoni kbira bil-volum tax-xogħol. Oħrajn jibdew jinkwetaw fuq il-marki, il-futur jew il-pressjoni biex “jagħmlu tajjeb”. 

U l-verità hi li l-istress waqt dan il-perjodu huwa reali ħafna.

Diversi studji internazzjonali juru li matul l-istaġun tal-eżamijiet ħafna studenti jesperjenzaw livelli għoljin ta’ stress u ansjetà. Fost l-iktar affarijiet komuni hemm in-nuqqas ta’ rqad, diffikultà biex wieħed jikkonċentra, irritabilità u għeja mentali. 

U frankament … mhux diffiċli tifhem għaliex. 

F’daqqa waħda, kull konverżazzjoni ddur mal-istess suġġett: 

“Kemm fadallek kapitli?” 

“Lest għall-matematika?” 

“Int diġà għamilt il-past papers kollha?”

Anke d-dar l-atmosfera tinbidel. Il-ġenituri jippruvaw jgħinu, l-għalliema jkomplu jfakkru kemm hu importanti li torganizza ruħek, u kull student jibda jagħmel orarji ġodda ta’ reviżjoni kull jumejn bħallikieku din id-darba se jbiddel ħajtu. 

U mbagħad hemm il-pressjoni tal-midja soċjali. 

TikTok u Instagram jimtlew b’rutini perfetti ta’ studju, noti colour-coded, u videos ta’ studenti li qishom ilhom jistudjaw minn Jannar mingħajr waqfa. 

Safrattant inti qed tipprova tifhem kif qattajt 20 minuta tħares lejn l-istess paġna mingħajr ma fhimt sentenza waħda. 

Imma importanti nifhmu li mhux kulħadd jistudja bl-istess mod. U mhux kulħadd jimmaniġġja l-istress bl-istess mod lanqas. 

Hemm min jippreferi jistudja bil-kwiet. Hemm min irid iqum u joqgħod ta’ spiss. Hemm min iħossu aktar produttiv billejl waqt li oħrajn kmieni filgħodu. 

U iva — hemm ukoll min ikollu ġurnata fejn sempliċement ma jirnexxilu jagħmel xejn. 

Dan ma jfissirx li fallejt. 

Waħda mill-akbar problemi waqt l-eżamijiet hija l-idea li student għandu jkun “produttiv” il-ħin kollu. 

Imma moħħ għajjien ma jaħdimx tajjeb. 

Kultant, pawsa żgħira, mixja qasira jew ftit mistrieħ jagħmlu aktar differenza minn tliet sigħat tħares lejn in-noti bil-paniku. 

Esperti fuq is-saħħa mentali jisħqu wkoll fuq l-importanza tal-irqad, rutina bilanċjata u li wieħed jitkellem meta jħossu stressjat iżżejjed. Għal xi wħud dan il-perjodu jista’ jkun tassew diffiċli u għalhekk importanti ħafna li nsibu lil min jifhimna. 

U forsi l-iktar ħaġa importanti li ħafna studenti għandhom bżonn jisimgħu bħalissa hi li marka ma tiddefinikx bħala persuna. 

Iva, l-eżamijiet huma importanti. Imma mhux aktar mis-saħħa mentali tiegħek. 

Mhux aktar mill-irqad tiegħek. 

Mhux aktar mill-paċi tiegħek. 

U żgur mhux aktar mill-valur tiegħek bħala persuna. 

Allura jekk bħalissa tħossok stressjat, waqajt lura jew qisek qatt m’int se tlaħħaq … taf li m’intix waħdek. 

Kważi kulħadd qed iħoss xi forma ta’ paniku bħalissa. Xi wħud sempliċement jaħbuh aħjar minn oħrajn. 

U jekk illum irnexxielek tiftaħ ktieb, tirrevedi ftit jew sempliċement tipprova … dik diġà hija xi ħaġa. 

Anke jekk ilek tgħid lilek innifsek “ħa nibda għada” għal ġimgħa sħiħa.