Ġurnata ma’ BirdLife Malta waqt Spring Watch

---

JAELLE BORG

Fil-5:30 ta’ filgħodu tat-Tlieta, din il-gazzetta ngħaqdet ma’ tim ta’ BirdLife Malta hekk kif il-voluntiera bdew jinġabru f’punt ta’ laqgħa qabel ma telqu lejn diversi hotspots tal-kaċċa madwar Malta bħala parti mill-operazzjoni Spring Watch.

Ir-ronda kienet immexxija mill-Kap tal-Konservazzjoni ta’ BirdLife Malta Nicholas Barbara flimkien ma’ Alice Tribe, koordinatriċi tal-Konservazzjoni, li matul in-nofsinhar tat-Tlieta kienu qed jikkordinaw osservazzjonijiet f’żoni differenti tal-kampanja Maltija.

L-ewwel pjan kien li t-tim imur lejn il-Madliena, iżda minħabba bidla fid-direzzjoni tar-riħ, il-pjan kellu jinbidel fl-aħħar minuta u t-timijiet tqassmu lejn postijiet oħra, fosthom l-inħawi tar-Rabat u żoni rurali oħra magħrufa għall-attività tal-kaċċa.

BirdLife Malta torganizza Spring Watch kull sena matul l-istaġun tal-kaċċa fir-rebbiegħa. L-operazzjoni tinvolvi timijiet ta’ bejn żewġ u erba’ voluntiera mqassmin madwar Malta u Għawdex f’punti strateġiċi li jagħtu fuq hotspots magħrufa tal-kaċċa. L-għan huwa li josservaw l-attività tal-kaċċaturi u jirrappurtaw kwalunkwe illegalità lill-awtoritajiet.

L-istaġun tal-kaċċa fir-rebbiegħa fetaħ fit-13 ta’ April u dam tliet ġimgħat, sat-3 ta’ Mejju. Matul dan il-perjodu, il-kaċċa għall-gamiem u s-summien hija permessa taħt regolamenti speċifiċi, filwaqt li speċi oħra migratorji jibqgħu protetti bil-liġi.

Hekk kif beda jidher l-ewwel dawl tax-xemx, diversi kaċċaturi setgħu jidhru mifruxa fuq għelieqi u għoljiet differenti fil-kampanja. Permezz ta’ trombi, it-tim ta’ BirdLife Malta beda josserva l-attività minn distanza.

Waqt ir-ronda, it-tim osserva allegata illegalità relatata ma’ dik li tissejjaħ bird calling.

Bird calling hija prattika illegali li tinvolvi l-użu ta’ apparat elettroniku jew tekniku li jimita l-ħsejjes tal-għasafar biex jiġbduhom lejn iż-żona tal-kaċċa, sabiex ikunu aktar faċli biex jintlaqtu.

Malli ġiet identifikata l-attività, ikkuntattjaw immedjatament lill-awtoritajiet biex jirrappurtaw il-każ u taw id-dettalji tal-post fejn kien qed jinstema’ l-apparat.

Madankollu, l-awtoritajiet ma laħqux wasslu fuq il-post hekk kif il-persuna allegatament involuta kienet diġà telqet wara li ndunat li kienet qed tiġi osservata.

Matul din il-ġurnata din il-gazzetta osservat ukoll diversi mumenti ta’ tensjoni.

Permezz ta’ trombi setgħu jiġu osservati xi individwi jagħmlu ġesti offensivi fid-direzzjoni tal-ħaddiema ta’ BirdLife Malta waqt li dawn kienu qed josservaw iż-żoni tal-kaċċa.

Nicholas Barbara spjega kif dawn is-sitwazzjonijiet mhumiex iżolati u li kull sena xi voluntiera jiltaqgħu ma’ ostilità jew intimidazzjoni waqt l-operazzjonijiet ta’ Spring Watch.

Huwa qal li minkejja dawn l-esperjenzi, jibqgħu għaddejjin bix-xogħol tagħhom biex jiddokumentaw dak li jkun qed iseħħ matul l-istaġun tal-kaċċa u biex jirrappurtaw kwalunkwe illegalità lill-awtoritajiet.

BirdLife Malta ilha snin twissi dwar l-impatt tal-kaċċa illegali fuq dawn l-ispeċi migratorji, partikolarment waqt ir-rebbiegħa meta l-għasafar ikunu qed jirritornaw lejn l-Ewropa.

Fi stqarrija maħruġa fi tmiem l-istaġun tal-kaċċa, BirdLife Malta qalet li matul din is-sena ġew irkuprati mill-inqas 14-il għasfur bi ġrieħi kkawżati minn tiri ta’ senter, fosthom diversi speċi protetti bħal seqer tal-passa, pagu, kokka u bufula żgħira. 

L-organizzazzjoni qalet ukoll li l-illegalitajiet żdiedu b’mod partikolari matul l-aħħar ġimgħa u nofs tal-istaġun, filwaqt li sostniet li l-preżenza tal-infurzar għadha insuffiċjenti biex twaqqaf il-qtil illegali ta’ għasafar protetti. 

BirdLife Malta semmiet ukoll każ ta’ seqer li kien ġie rriabilitat wara li kien intlaqat illegalment is-sena li għaddiet u li aktar tard instab mejjet wara li t-tracker tiegħu waqaf f’miżieb waqt l-istaġun tal-kaċċa. 

Hekk kif bdiet tavvanza l-ġurnata u l-kampanja bdiet timtela aktar moviment, it-timijiet ta’ Spring Watch komplew jissorveljaw iż-żoni tagħhom, lesti biex jirrappurtaw kwalunkwe illegalità oħra li setgħet isseħħ.