Iċ-ċerimonja tal-Iskejjel Promoturi tal-Kotba u l-Qari

---

Minn Mark Camilleri

Senior Manager mal-Aġenzija Nazzjonali tal-Litteriżmu

Nhar it-Tnejn, 26 ta’ Mejju, 2025, l-Aġenzija Nazzjonali tal-Litteriżmu, permezz tat-Taqsima tal-Libreriji tal-Iskejjel, organizzat ċerimonja fl-Iskola ta’ San Ġwakkin, Wied il-Għajn, fil-Kulleġġ ta’ San Tumas More li fiha ppremjat lill-iskejjel Promoturi tal-Kotba (Book Champion Schools) bħala parti miċ-ċelebrazzjonijiet tal-Jum Dinji tal-Ktieb 2025.

Matul din iċ-ċerimonja, l-Aġenzija qassmet il-premjijiet lil 92 skola primarja, medja u sekondarja li qed jippromovu b’mod regolari l-kotba, il-qari u l-litteriżmu fost l-istudenti u l-edukaturi tagħhom. Ir-rebbieħa ta’ kull kategorija, jiġifieri tad-deheb, fidda u bronż, ingħataw ċertifikat u kupun biex jixtru aktar kotba tal-qari. Ħames skejjel ingħataw il-Premju tal-Bronż, 22 skola ngħataw il-Premju tal-Fidda u 67 skola ngħataw il-Premju tad-Deheb. 

Fiċ-ċerimonja saru diskorsi qosra mill-Kap tal-Aġenzija Nazzjonali tal-Litteriżmu, is-Sur David Muscat, il-Prinċipal tal-Kulleġġ San Tumas More, is-Sur George Psaila u d-Direttur taċ-Ċentru tal-Litteriżmu tal-Università ta’ Malta, il-Professur Charles Mifsud. L-istudenti tat-tielet sena, immexxija mill-edukaturi tal-iskola primarja ta’ San Ġwakkin Marsaskala, tellgħu reċta bl-isem ‘Theo and the Box of Crayons’ fl-istess avveniment.

Sa minn meta bdiet issir din iċ-ċelebrazzjoni fl-2017 l-Aġenzija tat il-Premju tal-Bronż lil 61 student/a, il-Premju tal-Fidda lil 162 student u l-Premju tad-Deheb lil 354 student ta’ etajiet differenti mill-iskejjel u ċ-ċentri tal-kindergarten tas-setturi kollha. 

Fiċ-ċerimonja tas-26 ta’ Mejju ġew ippremjati wkoll l-edukaturi u l-istudenti mill-ewwel sena tal-kindergarten sal-ħdax-il sena tas-sekondarja li ġew l-ewwel, it-tieni u t-tielet fid-diversi kompetizzjonijiet tal-Jum Dinji tal-Ktieb 2025 imtellgħin mill-Aġenzija. Ir-rebbieħa ta’ kull sena tal-iskola ngħataw ċertifikat u kupun li jissarraf f’kotba u riżorsi tal-litteriżmu. Fil-kompetizzjonijiet ta’ din is-sena ħadu sehem 1,264 ruħ bejn edukaturi u student. 

Minn mindu bdiet issir din il-kompetizzjoni mill-Aġenzija Nazzjonali tal-Litteriżmu, tqassmu 8,522 premju lit-tfal tal-iskejjel primarji u 3,391 premju lil studenti tal-iskejjel medji u sekondarji. Din is-sena l-aktar skola li kellha rebbieħa kienet l-iskola ta’ San Franġisk, tar-Rabat Għawdex, b’erba’ rebbieħa f’kategoriji differenti tal-primarja. L-Aġenzija Nazzjonali tal-Litteriżmu tirringrazzja lill-għalliema, l-edukaturi u l-mexxejja tal-iskejjel li jħabirku biex iħeġġu l-qari u l-imħabba għall-kotba.