Inizjattivi biex it-tfal jiżviluppaw il-ħiliet tal-kitba

---

L-Aġenzija Nazzjonali tal-Litteriżmu torganizza attivitajiet ta’ kitba magħrufa bħala Xalati ta’ Kitba. Dawn ix-xalati jsiru kull xahar u huma maħsuba għal studenti li jkunu mit-tielet sas-sitt sena tal-primarja. 

L-għan ewlieni ta’ din l-inizjattiva huwa li tgħin lit-tfal itejbu l-abilitajiet tagħhom fil-kitba, kemm bil-Malti, kif ukoll bl-Ingliż, filwaqt li jgawdu postijiet ta’ interess kulturali, ambjentali jew rikreattivi. Matul dawn l-attivitajiet, il-ġenituri jiġu mistiedna jsegwu, jipparteċipaw u jitgħallmu kif jistgħu jassistu lit-tfal tagħhom fl-iżvilupp tal-ħiliet tal-kitba.

F’dawn l-aħħar xhur, ix-Xalati ta’ Kitba saru f’diversi mkejjen madwar Malta. Xalata minnhom, ta’ Ottubru, saret bi sħab ma’ Ambjent Malta fil-Park ta’ Kennedy Grove, is-Salini. Dan huwa spazju miftuħ fejn it-tfal jistgħu jitgħallmu u jiktbu f’ambjent rilassanti, imdawra bis-siġar u l-arbuxxelli, fl-isfond tas-Salini storiċi; atmosfera li għamlet din l-esperjenza edukattiva aktar pjaċevoli għat-tfal u l-ġenituri tagħhom.  

F’Novembru, imbagħad, kien imiss Forti Rikasoli, il-Kalkara. Din il-forti storika, li hija waħda mill-akbar fortifikazzjonijiet f’Malta, fiha fdalijiet storiċi u arkitettoniċi uniċi. It-tfal li attendew dix-xalata gawdew is-sbuħija u s-sens ta’ misteru ta’ dan il-post. Bis-saħħa ta’ Screen Malta, il-parteċipanti setgħu wkoll jaraw partijiet mis-sett tal-film ‘Gladiator 2’, li ħafna minnu nġibed propju ġo din il-forti.

Is-sena 2024 spiċċat b’attività ġewwa l-Parlament ta’ Malta, fejn is-sessjoni kienet marbuta ma’ wirja tal-presepji li għammret fil-Parlament l-Għaqda Ħbieb tal-Presepji. 

Dan il-post prestiġjuż offra opportunità unika lit-tfal biex jiddiskutu u jiktbu dwar it-tradizzjoni, l-istorja u l-arti tal-presepji Maltin. Dawn l-attivitajiet raw parteċipazzjoni attiva ta’ aktar minn 30 student u l-ġenituri/kustodji tagħhom. 

Fix-xhur li ġejjin l-Aġenzija Nazzjonali tal-Litteriżmu għandha mħejjija Xalati f’Ħaġar Qim, b’kollaborazzjoni ma’ Heritage Malta, u fil-gżira t’Għawdex, fil-Kappella ta’ San Dimitri, l-Għarb. 

Nirringrazzjaw lil dawk l-entitajiet li jissieħbu magħna f’dawn l-inizjattivi u lit-tuturi tal-kitba li jmexxu s-sessjonijiet b’tant kreattività u passjoni.

Barra minn hekk, l-Aġenzija torganizza wkoll sessjonijiet speċjali ta’ taħdit, qari, kitba u riflessjoni bl-isem Bil-Qari u l-Kitba nsib Spazju għal Qalbi. Dawn is-sessjonijiet jiffokaw fuq l-aspett spiritwali tal-istudenti. L-organizzazzjoni ta’ dawn l-attivitajiet issir b’kollaborazzjoni ma’ Spiritual Development in Schools tal-Kurja. Fl-aħħar erba’ xhur tas-sena 2024 saru sessjonijiet fil-Bajja s-Sabiħa ta’ Birżebbuġa u fil-Bajja tal-Mistra, il-Mellieħa. Tmienja u tletin student u daqstant ieħor ġenituri, ipparteċipaw f’dawn is-sessjonijiet.

Ix-Xalati ta’ Kitba u s-sessjonijiet ta’ Spazju għal Qalbi huma eżempji ċari ta’ kif l-edukazzjoni tista’ tkun esperjenza pjaċevoli u rilassanti filwaqt li fl-istess ħin tgħin lit-tfal jikbru f’kittieba kapaċi u kunfidenti. 

Ruth Calleja - Amministratriċi, L-Aġenzija Nazzjonali tal-Litteriżmu