‘Mal-Għoxrin’ – Logħba mill-istudenti għall-istudenti

---

Nhar it-Tnejn, 24 ta’ Frar 2025, filgħodu, il-Ministru għall-Edukazzjoni, Sport, Żgħażagħ, Riċerka u Innovazzjoni, Clifton Grima, nieda uffiċjalment il-logħba ‘Mal-Għoxrin’, logħba edukattiva li hija frott ta’ proġett ta’ ġemellaġġ bejn żewġ klassijiet tas-sitt sena minn żewġ skejjel: l-Iskola Primarja tal-Kulleġġ De La Salle, il-Birgu, u l-Iskola Primarja Dr Frans Chetcuti Skola ta’ Ħaż-Żabbar fil-Kulleġġ Santa Margerita. 

It-tnedija saret fil-Kulleġġ De La Salle, il-Birgu, bis-sehem tal-kapijiet tal-iskejjel rispettivi, l-għalliema u, fuq kollox, l-istudenti nfushom li ħadmu fuq din ir-riżorsa. Kemm qabel, kif ukoll waqt it-tnedija, intwera filmat tal-istudenti jilagħbu din il-logħba, filwaqt li l-logħba ntlagħbet ukoll dak il-ħin stess, fil-preżenza tal-Ministru, il-membri tal-amministrazzjoni tal-iskejjel rispettivi, l-għalliema u uffiċjali tal-Aġenzija Nazzjonali tal-Litteriżmu. 

Il-Kap tal-Iskola Primarja tal-Kulleġġ De La Salle, is-Sur Nicolai Mifsud, tkellem dwar din il-logħba, segwit mis-Sur Stephen Cachia, id-Direttur tal-Kulleġġ De La Salle. Il-Ministru għall-Edukazzjoni, Sport, Żgħażagħ, Riċerka u Innovazzjoni, l-Onor. Clifton Grima, għalaq din it-tnedija b’kelmtejn ta’ ringrazzjament.

Il-logħba ‘Mal-Għoxrin’ se titqassam fl-iskejjel mill-Aġenzija Nazzjonali tal-Litteriżmu, bil-għan li l-istudenti jilagħbu din il-logħba bejniethom u flimkien mal-għalliema rispettivi, tagħhom. 

Il-logħba tgħin lill-istudenti jitgħarrfu dwar aspetti differenti tal-kultura Maltija, ngħidu aħna, il-festi, ikel tradizzjonali, personalitajiet magħrufa u postijiet ta’ interess u storiċi. Permezz tal-logħba, l-istudenti se jkollhom ukoll l-opportunità jużaw mezzi differenti ta’ tagħlim: il-kitba, l-illustrazzjonijiet, kif ukoll il-kodiċi QR. 

Il-kaxxa tal-logħba hija magħmula minn 6 mazzi ta’ kards (30 kard f’kull mazz), damma, klessidra; u karta bl-istruzzjonijiet. Xi wħud mill-karti għandhom ukoll kodiċi QR b’filmati, ritratti jew illustrazzjonijiet diġitali.

L-illustrazzjonijiet ta’ din ir-riżorsa nħolqu minn Sarah Pisani, f’kollaborazzjoni mas-Sur Wayne Farrugia mill-Aġenzija Nazzjonali tal-Litteriżmu u l-għalliema tal-iskejjel rispettivi. Il-logħba ġiet ippubblikata mill-BDL u Horizons u kienet iffinanzjata mill-Aġenzija Nazzjonali tal-Litteriżmu. 

L-Aġenzija tirringrazzja b’mod partikolari lill-għalliema Glorianne Agius, Rita Azzopardi, Sarah Borg u Franklan Debono li kienu l-moħħ wara din l-inizjattiva. Ta’ min ifakkar li sa mit-twaqqif tagħha fl-2014, l-Aġenzija Nazzjonali tal-Litteriżmu kienet involuta fil-ħolqien ta’ madwar 30 logħba edukattiva bil-Malti. 

Kitba ta’ David Muscat

Kap tal-Aġenzija Nazzjonali tal-Litteriżmu