Xalata ta’ Kitba fil-Vatikan u Ruma

---

Nhar il-Ġimgħa, 14 ta’ Marzu 2025, l-Aġenzija Nazzjonali tal-Litteriżmu, bis-sehem tal-Uffiċċju tas-Segretarju Permanenti tal-Ministeru għall-Edukazzjoni, l-Isport, iż-Żgħażagħ, ir-Riċerka u l-Innovazzjoni, organizzat Xalata ta’ Kitba għal 63 Brillantin/a tal-Kitba mill-iskejjel primarji tal-istat fil-belt tal-Vatikan u Ruma. 

Il-Brillantini tal-Kitba huma studenti tas-sitt sena tal-primarja (Year 6) li jibbrillaw fil-kitba. Kull skola primarja tal-istat għażlet tifel jew tifla biex tipparteċipa f’din l-attività kulturali u edukattiva. 

L-għażla tal-istudenti saret skont il-marka/grad li ġabu l-istudenti fil-komponent tal-kitba kreattiva fl-eżamijiet jew assessjar annwali tal-Malti u l-Ingliż tal-ħames sena (Year 5) tas-sena skolastika li għaddiet (2023-2024).

Fil-mawra tagħhom fil-belt kapitali tal-Italja u l-Vatikan, l-istudenti ttieħdu jaraw il-Bażilika ta’ San Pietru fil-Belt tal-Vatikan, Piazza del Popolo, Terrazza di Pincio, Via del Corso, Colonna di Marco Aurelio, Palazzo Chigi, Palazzo Montecitorio, Piazza della Rotunda, Pantheon, Piazza Sant’Ignazio, Fontana di Trevi, Piazza di Spagna, il-Foro Romano, il-Kolossew, il-Palatino, Circo Massimo u Terme di Caracalla.

Fost attivitajiet oħra, il-brillantini fasslu abbozz ta’ kartolina fuq il-karti mogħtija, xtraw kartolina u bolla mill-gabbana ta’ Pjazza San Pietru, kitbu fuqha messaġġ lil qrabathom u bagħtuhielhom bil-posta. 

L-Aġenzija Nazzjonali tal-Litteriżmu tixtieq tirringrazzja lis-Segretarju Permanenti fil-Ministeru tal-Edukazzjoni, is-Sur Matthew Vella, lill-Ambaxxatur ta’ Malta għall-Vatikan, is-Sur Frank Zammit u l-Ambaxxatur ta’ Malta għall-Italja, is-Sur Daniel Azzopardi tas-sehem tagħhom fit-tfassil u t-twettiq ta’ din l-attività. 

Irroddu ħajr ukoll lill-impjegati tal-Aġenzija, l-uffiċjali edukattivi, il-kapijiet tad-dipartiment tal-litteriżmu u l-għalliema li mexxew u ħadu ħsieb it-tfal tul din ix-xalata ta’ kitba u kultura.  

Ta’ min ifakkar li kull xahar l-Aġenzija torganizza xalata ta’ kitba għall-familji f’post storiku, rurali jew kulturali f’Malta jew Għawdex. 

Min ikun irid aktar informazzjoni jista’ jċempel 2598 3326 jew iżur il-paġna tal-Facebook tax-Xalati tal-Kitba. 

Kitba ta’ David Muscat

Kap tal-Aġenzija Nazzjonali tal-Litteriżmu