Isle of MTV – Fost l-ikbar kunċerti fl-Ewropa ġewwa pajjiżna
Bosta artisti ta’ fama mondjali taw prestazzjoni tal-blieh fuq il-Fosos tal-Furjana
Minn Lady Gaga sa Nelly Furtado, bosta artisti ta’ fama mondjali taw prestazzjoni tal-blieh fuq il-Fosos tal-Furjana. Din is-sena hemm lista ta’ kantanti li ħa jerġgħu jimlew il-Fosos bin-noti melodjużi tal-mużika tant maħbuba tagħhom.
Fost l-iżjed kantanti magħrufa li ħa jkanta fuq il-palk din is-sena hemm Damiano David, il-kantant tal-grupp Måneskin li rebaħ il-Eurovision Song Contest tal-2021 bid-diska ikonika ‘Zitti e Buoni’. Fl-2024, David beda l-karriera tiegħu bħala kantant indipendenti fejn ħareġ l-ewwel album tiegħu bit-titlu ta’ ‘Funny Little Fears’.
Il-kantant tkellem mal-midja fejn qal li avolja qatt ma ġie Malta, xorta waħda huwa veru eċitat hekk kif ħuh iddiskriva lil Malta bħala post b’ikel u nies bomba.
Kantant ieħor li wieħed tajjeb li jinnota fost dawk li ħa jkantaw huwa ALOK, DJ Brażiljan magħruf bħala r-raba’ l-aħjar DJ tad-dinja. L-iżjed diska popolari t’ALOK hija ‘Hear Me Now’ li ddominat numru ta’ klassifiki internazzjonali. ALOK beda l-karriera mużikali tiegħu ta’ 12-il sena u minn hemm baqa’ tiela l-klassifiċiki u anke ġie ppremjat bħala l-aħjar DJ tal-Brażil.
Ella Henderson ħa tingħaqad ma’ dawn it-tnejn sabiex tifforma l-lista tal-kantanti għall-Isle of MTV ta’ din is-sena. Henderson bdiet il-karriera mużikali tagħha fl-2012 fuq il-programm televiżiv ‘The X Factor UK’, fejn avolja ma rebħitx xorta waħda rebħet qalb is-segwaċi.
Waqt l-avveniment ħa tagħti prestazzjoni wkoll il-kantanta Maltija Miriana Conte. Conte għadha kif ġejja friska friska mill-Iżvizzera, fejn hi rrappreżentat lil Malta waqt l-Eurovision ta’ din is-sena bid-diska ‘Serving’.